كشف سعفان الصغير، مدرب حراس مرمى منتخب مصر، كواليس اختيار مصطفى شوبير حارسًا أساسيًا للفراعنة في كأس العالم 2026، ورد فعل محمد الشناوي بعد إبلاغه بأنه سيكون الحارس الثاني، كما تحدث عن رحلة معاناته بعد اعتزال كرة القدم قبل العودة إلى الواجهة مع المنتخب.
وقال سعفان الصغير، في تصريحات تلفزيونية عبر قناة ON: "إبراهيم حسن مدير المنتخب من أبلغ محمد الشناوي أنه سيكون الحارس الثاني واقتنع من داخله، ولكنه كان حزينًا وهذا الحزن كان داخليًا مثل أي لاعب لا يلعب ولكن هذا الحزن لم يخرج في التمرين."
وأضاف: "الشناوي بيسند مصطفى شوبير، أنا في مباراة أستراليا كنت بصلي بين الشوطين ومصطفى متعود لما بينزل الشوط التاني لازم أسخنه شوية عشان يبقى جاهز، فلما طلعت متأخر لقيت الشناوي هو اللي بيسخن شوبير وهو اللي بيشوط عليه."
وأردف: "الشناوي لم يطلب المشاركة لبضع الدقائق من أجل تحقيق رقم قياسي."
وانتقل سعفان الصغير للحديث عن الفترة الصعبة التي عاشها بعد اعتزال كرة القدم، قائلًا: "أنا بعد ما بطلت كرة سافرت أمريكا سنة 2000 وكنت بغسل عربيات وبغسل صحون واشتغلت في مشحمة واشتغلت دليفري واشتغلت حاجات كتير جدًا وكنت حاسس إني مكسور."
وأضاف: "بس لما سافرت أمريكا المعسكر ده بنتي كتبت بوست إن البلد دي بابا اتكسر فيها سنة 2000 بس هو رجع لها تاني وهو بطل وأنا فخورة بيه."
وتابع: "الشغل عمره ما كان عيب، اتبهدلت واشتغلت هناك، وبعد الاعتزال ما كانش قدامي حل غير السفر، قعدت خمس سنوات، وبعدها رجعت مصر."
واختتم تصريحاته: "كان نفسي أمي تبقى عايشة وتفرح بيا، هي فرحت معايا قبل كده بالدوري والكأس، لكن كان نفسي تشوفني وأنا في المنتخب، كانت زعلانة عليّ وأنا متبهدل في أمريكا، وكان قلبها بيتقطع عليا."